5 نصائح ذهبيه للمبتدئين في مجال العمل الحر او الـ Freelance


لو كنت جديد في مجال العمل الحر او الفري لانس , فغالباً اللي شدك للموضوع هو فكرة انك ممكن وانت قاعد في البيت تكسب فلوس كتيييير جدا بدون اي مجهود .

 ويؤسفني يا عزيزي اني اقول لك ان الفكره دي غلط وان اللي بيكسب من العمل الحر بذل مجهود كبير جدا لحد ما وصل للدرجه دي, ولحد ما قدر يوفر لنفسه دخل محترم ينافس مرتبات وظائف الناس بتحلم بيها

المهم , لو انت لسه بادئ في موضوع الفري لانس او حتي شغال من فتره في العمل الحر فدول 5 نصائح ذهبيه بمعني الكلمه النصائح دي هتساعدك كتير انك تبدأ فعلا في كسب دخل محترم او تزود دخلك الحالي من مواقع زي خمسات أو Fiverr أو elance , odesk , freelancer .....الخ

 نبدأ بقا في النصائح علي بركة الله

1- اخرج من غرفة النوم 


 معظمنا وخاصة في الشتا دا بيحب ياخد اللابتوب في حضنه وبيريح علي السرير طول اليوم ودي كارثه بكل المقاييس فلازم تخرح من غرفة النوم حالا لو انت عايز تنجح في مجال العمل الحر.... ليه بقا؟؟؟؟؟
 بيقولك ان فيه حاجه اسمها الـComfort Zone أو منطقة الراحه ودي منطقه الانسان بيحب يأنتخ فيها لانه مستريح وأهم Comfort Zone لأي حد هي غرفة النوم فغالبا طول ما انت فيها هتحس علطول بالخمول والنوم فانتاجيتك وابداعك هيقل بكل تاكيد ,
فلو عايز فعلا تحقق نجاح في العمل الحر , لازم تخرج من منطقه الراحه اللي هي "غرفة النوم" وخد اللابتوب اطلع في الصالون او فوق السطوح حتي...... أو اي حته بعيده عن منطقة الراحه
وابدأ الشغل بجد.

2- الالتزام و أخذ الموضوع بجديه 


لو انت داخل مجال العمل الحر كتجربه يا صابت يا خابت فانصحك انك تخرج حالا وتفكر في شغلانه تانيه , لازم عشان تنجح في المجال دا انك تأخده بجديه فعلاً , وان دا شغل زي اي شغل وتلزم نفسك بساعات عمل كأنك في وظيفه في قطاع خاص .

 وفي تجربة اتعملت علي شريحة من الناس و وجدوا ان اي حد بيعمل حاجه معينه لمدة 4 ساعات يوميا في سبيل تحقيق هدف معين بيوصل فعلا في النهايه لتخقيق الهدف دا. فحاول تلزم نفسك بعدد ساعات معين تشتغل فعلا وبجد لأنها وظيفه زي اي وظيفه تانيه.

3- طور من نفسك باستمرار


لازم ما توقفشي عند حد معين , يعني مش علشان اتعلمت برنامج فوتوشوب تقول خلاص انا كدا Professinal Graphic Designer ....لا يا راجل... !!! لازم عشان فعلاً توصل لدرجة الاحترافيه انك تتعلم وتطور نفسك باستمرار وما توقفشي ابداً لان التعلم ليس له نهايه .
 فمثلاً لو انت مستواك متوسط في برنامج معين مثلا فوتوشوب , ابحث عن دورات مستويات متقدمه 
واتعلم وطور من نفسك باستمرار .....وهكذا مع اي برنامج تاني .

4- اتعلم من الناجحين


النجاح في اي حاجه ما بيجيش من يوم وليله , النجاح بيكون نتيجه تجربه طويله مريره ومشاكل وضغط مستمر , فعشان تجنب نفسك المشاكل والضغط دا , حاول تتعلم من الناجحين في المجال اللي انت بتفكر تدخله , تواصل معاهم واسألهم واستفسر منهم عن كل حاجه , ولو هما من المشاهير زي ستيف جوبز او مارك زاكربرج فبيكون لهم فيديوهات بيحكوا فيها عن تجاربهم, وحاول تستفيد قدر الامكان من قصص نجاحهم.

5- انتظر ثم انتظر ثم انتظر


أخر حاجه واصعب حاجه هي الانتظار , فعلاً دي حقيقه ما حدش يقدر ينكرها . انت ممكن تطبق النصائح الاربعه اللي فوق وما يحصلشي حاجه وما تكسبشي حاجه فيجيلك اكتئاب وتزهق وتسيب الموضوع خالص , بس أحب أقولك ان الموضوع بيحتاج وقت .

يعني انت لو حابب تأكل لحمه مش بتحطها علي النار وتستني حوالي علي الاقل 30 دقيقه ...ينفع بقا انك بعد 3 دقائق تطلع اللحمه وتقول انها بايظه وترميها في الزباله .....انت رمتها لانك ما استنتشي عليها وما انتظرتش لحد ما تستوي.
كذلك العمل الحر , بعد ما تطبق النصائح دول عليك بالانتظار وما تملش أبداً وحاول تستغل الوقت دا تطوير نفسك باستمرار
 وحط الكلمتين طول  حلقه في ودنك:
"ان الله لا يضيع أجر من أحسن عملا"
وهذا هو خير الختام ... :)

شارك الموضوع

إقرأ أيضًا